Dokumentet e palës zvicerane

Që të merren dokumentet nga pala shqiptare duhen dokumentat e mëposhtme për të fejuarin zviceran:

- Extrait de l'acte de naissance ( Kopje e aktit të lindjes)
Ky merret në gjendjen civile të komunës ku ka lindur i fejuari zviceran dhe duhet légalizuar në kancelarinë e kantonit; për tonin ishte Chancellerie de l'Etat de Fribourg, vula kushton 5 franga zvicerane.



- Certificat de l'état civil (çertifikatë e gjendjes civile)

Kjo merret te gjendja civile e komunës ku banon dhe i duhen bërë adetet si aktit të lindjes.

- Kopje e legalizuar e pashaportës e të fejuarit zviceran.

Kjo bëhet te një noter dhe legalizohet në të njëjtin vënd si letrat më lart.


Po ashtu, letrat më lart duhen përkthyer nga frëngjishtja në shqip nga një përkthyes i njohur në Zvicër.


- Nëse s'shkon dot vetë në Shqipëri të merresh me këto punë, duhet të bësh dhe një prokurë për prindin. Kjo bëhet në Ambasadën shqiptare në Bern dhe kushton 20 Euro.

Merren këto letrat, çohen në Shqipëri dhe me këto mund të marrësh çertifikatën për lidhje martese, nëse nga varavingot s'të ka ikur akoma dëshira.

Përse bëhet fjalë?

Ndryshe nga ç'mund të mendojnë mendjet e përçartura, këtu s'do t'ju tregoj se si të njihesh, të dashurohesh, të jetosh apo të bësh kalamaqër me një zviceran, por çfarë dokumentash duhen për t'u martuar në gjendjen civile në Zvicër, meqenëse këto nuk ekzistojnë në asnjë faqe zyrtare të shtetit mëmë (Shqipëri) apo të shtetit pritës.

Deri tani kemi harxhuar tre ditë kohë, 2 orë telefon me familjen dhe me njëri tjetrin dhe dimë vetëm se për shtetasin shqiptar kërkohen:

- çertifikatë lindje e legalizuar në Ministrinë e punëve të jashtme

- çertifikatë për lidhje martese e legalizuar në Ministrinë e punëve të jashtme

Certifikata merret në gjendjen civile përkatëse.

Legalizimi bëhet nga Ministria dhe shfaqet me një vulë ku shkruhet frëngjisht "Apostille".


Që të merren këto dokumenta në Shqipëri, shtetasi zviceran duhet të çojë në Shqipëri një sërë dokumentash, për të cila do t'ju flasim në ditët e ardhshme.